असेराडो Aceredo गाव भुताचे गाव

रहस्यमयी गोष्टींचे माणसाला कायम कुतूहल राहत आले आहे. आपण लहानपणापासून  भुताच्या गोष्टी ऐकत आलो आहोत. त्यामध्ये एखादे जुने  घर,वाडा, झाड किंवा व्यक्ती झपाटलेले असतात. ते अदृश्य होतात आणि पुन्हा येतात. असेच स्पेनमध्ये अख्खे गावच बुडाले आणि आता पुन्हा दिसू लागले आहे. होय! आम्ही स्पेनमधील  असरेडो या गावाविषयी बोलत आहोत. हे गाव ३० वर्षांपूर्वी  पाण्यात पूर्णपणे बुडाले होते. मात्र आता जलाशयाचे पाणी आटल्याने ते पुन्हा दिसू लागले आहे. तिथले लोक आता या गावाला भूताचे गाव म्हणतात.

स्पेनमधील गॅलिसिया प्रदेशात असेराडो Aceredo नावाचे गाव होते. १९९०  साली या गावाच्या मार्गाने एक जलाशय बांधण्यात येणार होता. तेव्हा या गावात ७० घरे आणि १२० नागरिक राहत होते. हे गाव छोटेसे असले तरी तो दुष्काळी भाग होता. त्यामुळे या गावाशेजारी असलेल्या बुस्कल्क हे गावही जलाशयाखाली जाणार होते. त्या वेळी सर्व लोकांना स्थलांतरीत करण्यात आले. पण स्थानिकांचा विरोध होता.  संतप्त नागरिकांनी  तक्रारी, निषेध केला. तसेच १० दिवसांचे उपोषणही केले. परंतु त्यांच्या विरोधाला न  जुमानता त्यांना स्थलांतरीत होणे भाग  होते.

त्यासाठी काम सुरु झाले आणि  जेव्हा एका धरणातून पाणी सोडण्यात आलं तेव्हा लिमिया नदीला पूर आला आणि गाव पाण्यात बुडाले.  सुदैवाने अनेकजण स्थलांतरीत झाले होते. ऐतिहासिक चर्च  तेथून हलवण्यात आले होते. खूप घाईत स्थलांतरीत केल्यामुळे त्यावेळी असणार्या अनेक वस्तू  बुडाल्या. त्या आता पाणी आटल्याने  दिसू लागल्या आहेत. गंजलेल्या गाड्या, रिकामे टेबल, बाटल्या ,डबे  अश्या अनेक वस्तू दिसतात. ज्या कुटुंबांना स्थलांतरित करण्यास भाग पाडले गेले त्यांचे नुकसान झाले. अनेक जण पिढ्यानपिढ्या असेराडो Aceredo मध्ये राहत होते, त्यांना दुसरे घर कधीच माहीत नव्हते. काहींनी जवळच्या गावांमध्ये स्थलांतर केले पण पर्याय नसल्यानेच!

हा परिसर आता मोठ्या संख्येने पर्यटकांना आकर्षित करत आहे. अनेकजण  हे गाव पाहण्यास भेटी देत आहेत. या गावचे अनेक व्हिडीओ आणि फोटो व्हायरल होत आहेत. हवामानातील बदलामुळे  स्पेनचा सुमारे १० टक्के भाग अधिकृतपणे दुष्काळग्रस्त  म्हणून  घोषित करण्यात आला आहे. हा बदल पुढच्या अनेक पिढ्यांना भोगावा लागतो.

असेराडो Aceredo गावची ही गोष्ट तुम्हाला कशी वाटली जरुर कळवा.

शीतल दरंदळे